Bongot

Day 18

Adapted from Discovering Joy: Daily Meditations for Friends of God by Marie Chapia

Sajay day nay-arigan ni shila: ootik nga agpayso, nem ebadeg i banag ni toka ikowan. May-eshig pay shi apoy. Angkhen na ootik i shalang ni apoy no pilmiro, mebedin na poolan toy embanaw wa shontog. –James 3:5, Inibaloi DMP

Karam itolok jen sheshalen toka

         ira ni esel jen kaonbo-day shi bongot mo.

Ta sota ira mo kaikowan, kabaalan to

         jen menekit, meneshal, memono.

Nem kabaalan to ngo

         jen mena-jok, ontolong para shi pansigshan,

         mengipakedsang ni nemnem

         tan mengi-kan ni pansi-metan shi biyag.

Karam itolok jen waray naalas ono edogit jen esel

         ja medepod bongot mo;

               karam itolok iray ngaaw jen esel.

Say iesel mo koma bengat ket sota mapteng

         tan sota makatolong para shi pansigshan,

               sota aliven emenekit,

               sota kosto.

Ikan moy kaasi,

         semek,

               kinamapteng,

so ni emin na emengitneng son si-kham.

         Panbalin ken kebindisyonan ni eshom.

Karekayo mengikokowan ni kasesakit ta esel. Say pesing jo komen mekitbal, ienam jo nodta kasapolan ni mengitneng, say mapteng i pengitneng sha, tan say onkedsang i pamatira. 

                                                                                                 –Ephesians 4:29, Inibaloi DMP

Toway Kadnan ni Kinabaknang Mo?

Day 17

Adapted from Discovering Joy: Daily Meditations for Friends of God by Marie Chapian

Nem say epateg komen nemnemen jo, sota pantoshayan nen Apo Shiyos. No sajay i pesing jo, emin na banag ja kasapolan jo, ieshom nen Apo Shiyos ja iakan son si-khayo. 

                                                                               –Luke 12:31, Inibaloi DMP

Angkhen na kokowaen moy intiron dobong,

         singa met laeng jen enshin polos i kokowam.

Sota ira emengibiyang ni emin

         ket sota ira edawag i sha kepengesas.

Si-khara sota emengikowan ey,

         “Nay-anakak ja enshiy angkhen nganton osal ko

         et meteyak ja enshiy nak itakin.”

Enshin polos i waren si-kham

         no enshiak,

nem sobsobda i kinabaknang mo

         no wara ka son Si-khak.

Sota kinabaknang Ko,

         eg maomas,

         sigsigorado.

No toway nay-edetan ni nemnem mo,

         si-khato ngoy kawad-an

         ni kinabaknang mo.

Say khabol la inbilangan ko so ey enshiy silbi to, inamtaan kos Cristo Jesus ja Apok, jet si-khato may mas epatpateg son si-khak. Maypangkhep ni inonoran ko son Cristo, inbiyang kon emin i wara son si-khak et no nemnemen ko, singa ensekhig sotan na dingdingkhak nontan. Sajay i inpasing ko say metopog i nemnemnemen ko, ja si Cristo ni olay bengat. 

                                                                         –Philippians 3:8, Inibaloi DMP

Sota maypangkhep son Cristo shi dangit, si-khato komay nemnemnemen jo, ja aliwen inges toy nemnem ni karakdan na tood ja dobong, -Colossians 3:2, Inibaloi DMP

No kaspangarigan ey kinokowa ni sakey ya too i emin na wared ja dobong, enshiy silbi nontan na kinokowa to, no eg to khon-oren sota biyag ja enshiy to engintegan. –Luke 9:25, Inibaloi DMP

Jet kowan nen Job ey, “Nay-anakak ja enshiy angkhen nganton osal ko et meteyak ja enshiy nak itakin. Si Yahweh i engi-kan ni emin et si-khato met laeng i engoli. Meshejaw i ngaran nen Yahweh!” –Job 1:21, Inibaloi draft

Shi dangit komay wa-wa-shen pengolnongan jo ni kokowayo, ta sota kawad-an ni kokowayo, si-khatoy wared nemnem jo ni olay. –Luke 12:34, Inibaloi DMP

Si-khak i Khajem Mo

Day 16
Adapted from Discovering Joy: Daily Meditations for Friends of God by Marie Chapian

Eg ka ma la ma-vagan na dogad jen “Ebaybay-an”,
               ono eg ma la mebshayan i bo-day mon “Nay-olay.”
Nem say may-evag ali son si-kham, “Hephzibah.”*

               Jet mayngadnan aliy bo-day mo jen “Beulah.”**

Tep si-kham, toka kepan-imdengi nen Yahweh,

                jet sattan na dogad, ibilang to ey epateg ja inges toy kinapateg ni aseva.

                                                                                     –Isaiah 62:4, Inibaloi draft

*Say olog ni Hephzibah ket “Dogad ja Kepan-imdengin Yahweh”

** Say olog ni Beulah ket “Sota Edadsak jen Engaseva”

Si-khak i khait ni ena-khas jen titit.

         Si-khak i khait iren naatiw, nonta ira ena-ngos,

         nonta ira entakot, nonta ira ekapoy.

               Waraak son si-kham.

Nay-esopak so nonta ira naybaba,

         so nonta ira emanbebayedbed khabol ni takot sha,

         so nonta ira emandeshingit.

               Nay-esopak son si-kham.

Waraak so nonta ira emandeshingit,

         so nonta ira esaktan, so nonta ira enaybiyang.

               Waraak son si-kham.

No enshiy mo maosal,

         ono enshiy khajem mo,

               no singa sota sakit bengat i khait mo,

               no nabdey malay deknam

                              tan inmekdas malay nemnem mo

               khabol iren paras ni biyag,

                              Si-khak i khajem mo.

Say sebien mo son Si-khak

         ket sota empetang jen nak kepeningkhay.

Pojoken Koy ensakit,

         ipa-sas Koy semek Kon si-kham,

               iakan Kon si-kham i diwdiwa.

Jet no vingien mowak

         khabol ni pamatim,

               ja inevat mo sota semek jen nak kepan-iawat,

         Bediwan taka:

Mebadoan i emin.

         Sajay i nak kedag-a son si-kham—

               ta si-kham

ket kokowak.

Isonga karekayo ontakot tep mas ebadbadeg pay i semek to son si-khayo nem say sota eshakel la titit. –Matthew 10:31, Inibaloi DMP

Sota ira lion, ira ema-khang
               tan ira emankoddang ni mekan;
Nem sota ira si Yahweh i sha kepiyala,
               eg ira mankoddang shi kasapolan sha. –Psalm 34:10, Inibaloi draft

Aliwen bagaen may pengibidang ko son si-khayo, ta say bagaen, eg ikowan nonta apo to son si-khato i emin na to kedagdag-a. Isonga say awag ko son si-khayo, kagajem takejo, ta emin sota inkowan nen Amak son si-khak, inpa-amtak son si-khayo. –John 15:15, Inibaloi DMP

Jet angkhen sipen too ja memati so nen Cristo, mebediwan i wared nemnem to; singa badon palsowa ma. Sota sigod ja ogadin ngaaw, enshi mala, jet sota bado, si-kkatoy naysa-dat ma. 

                                                                 -2 Corinthians 5:17, Inibaloi DMP

Jet sota wared ma tongawan, kowan to ey, “Niman, sa-datan ko ni badon emin sota sigod!”  

                                                                 –Revelation 21:5a, Inibaloi DMP

Kansiyon jen In-akan Kon Si-kham

Day 15
Adapted from Discovering Joy: Daily Meditations for Friends of God by Marie Chapian

Mankansiyonak ni shayaw kon si-kham, O Yahweh ja Shiyos  ko,
                ikankansiyonan taka ingkhatod wara pay laeng i jasjas ko. 

                                                                  –Psalm 104:33, Inibaloi draft

Pipiyan koy mo kepankankansiyon!

                Pankansiyon ka—sattan ket emengi-kan ni imdeng son Si-khak.

Ikan mo Si-khak

                sota kansiyon jen nak kaiakan son si-kham.

Emansada tan emankansiyon iray emin na wared dangit

                no mo kaosalay boses mon mankansiyon

                tan no mo kaosala iray instrumento jen para mosiko

                                jen mengirejaw son Si-khak.

Sota ira anghil ket emekikansiyon tan emekiimdeng

                son si-kham.

No say mo kepan-enapa ket sota kepengirejaw

                ni eshom

                mebdey ken bengbengat

                khabol iren bakal

                                tan kaenshi ni kepnekan tan talna.

                No ka emanbibiyag para shi naindobongan jen kayshejawan ni kinadaing mo

                                sakbaten mo bengat i digat ni nemnemnem tan shanag.

Araviim koma sota solisog

                jen sota kay-a-tek ono kayshejaw i mo an khamkhaman.

Say piyan ko

                aliven sota ira nangkemapteng jen boses;

Say nak kay-imdengi

                sota kansiyon ono mosiko jen edapo so nonta ira totoon to-to-ven emanshejaw.

No mesa-nop kayo, ikansiyon jo sota kansiyon ja pengirejaw son Apo Shiyos, pati sota ira salmo, ta si Apo Shiyos i emengitneng. Jet angken mansisi-jan kayo, pan-imdeng kayo met laeng ja singa kayoka emankankansiyon shi poso jo. Angkhen ngantoy medekha son si-khayo, pan-iyaman kayo ni olay so nen Apo Shiyos ja Ametayo, jet maykadwa ni olay i ngaran nen Jesucristo ja Apo tayo. 

                                                                                                     –Ephesians 5:19-20, Inibaloi DMP

Jet niman, say eg jo dibdibkhan sota toro ja intenengan jo ja esel nen Cristo, osal jon emin sota amtayon pesing nga mengitosho, tan memanshaan, ni sakey tan sakey son si-khayo. Tan i-shom jo pay shi iyaman jo son Apo Shiyos sota kankansiyon ja pengirejaw son si-khato, pati sota ira salmo. 

                                                                                                      –Colossians 3:16, Inibaloi DMP

Daw Ka Ali son Si-khak

Day 14
Adapted from Discovering Joy: Daily Meditations for Friends of God by Marie Chapian

No sota mapteng ni olay i edistoan jon dag-en, manmanoy mengitoded ja menekit son si-khayo. 

                                                                                                                –1 Peter  3:13

Si-khak sota anam ton sesmeken ni emin na palsowa:

                Si-khak i mismon semek,

                Si-khak i engipawesha ni emin,

                Si-khak i edapoan ni biyag.

No say piyan jo ket maaknan ni shayaw

                shi dangit,

si-khayo komay mengipa-sas ni semek:

                ipasas jo komed ogadiyo jen waray kaasiyod eshom,

                pakawaniyo koma sota ira waray nanbasolan sha son si-khayo.

Say kinashonong tan pengi-kan ni rispito

                ket ogadi jen naindangitan.

Sota Apom tan Mengisedakan mo, enshiy kharil son si-khato,

                aliven eman-oowap,

                eg menoyshoy

                                jen to iba-ngat jen pebesolan

                                i mismon kokowa to.

Say komen itenengan mo ket sota kowan Ko.

                Nak aya kaiba-ngat jen memedaw ni eshom?

                Nak aya kaiaamisi i eshom?

                Ayshi!

Say semek ko, enshiy ingkha to;

                Taka kaiesop ni olay son si-khak

                babaen ni semek ko jen enshiy kolang to.

No mo kedag-a i piyan Ko,

                enshiy baal ni ngaaw wa esel jen meneshal;

                eg onsharal i kepemedaw ni eshom.

No say piyan mo ket wara komay mengevat son si-kham,

Daw ka ali son Si-khak.

Sota ira karim, Yahweh, ket enshiy kebedawan to,
                arig toy silver ja naydotod kangi ni eminpito ja eporo. –Psalm 12:6, Inibaloi draft

     Say piyan na a-selen nonta emin na inkowan ko la, sajay. Mesepol la man-iinawatan kayo, tan mesepol la waray pengisekit jo ni sakey tan sakey son si-khayo. Semek joy sakey tan sakey son si-khayo, ta san-aakhi kayo shi pamati. Nemnem joy pansigshan ni eshom jet pankikinombaba kayo. 

     No bilang ey waray too ja ngaaw i dingkha to ono inkokowan to son si-khayo, aliwen jo ibales ja ngaaw ngoy dag-en jo ono ngaaw ngoy ikowan jo son si-khato, no diket ikowan jo koma ey si Apo Shiyos i onbindisiyon son si-khato. 

     Ta say khabol ni pinidian nen Apo Shiyos son si-khayo, piyan ton mapteng komay pesing jo so ni eshom, say bindisiyonan tokejo. Isonga waray naysolat nonta bayag da ja esel nen Apo Shiyos ja kowan to ey, “Sota toon piyan ton mapteng i biyag to shiya dobong, tan piyan to ja mewad-an ni imdeng, mesepol la enshiy to ikokowan na ngaaw wa esel ono to dag-en na pengiowap. Mesepol la isalsheng to sota aramid ton ngaaw, ja sa-datan to ni mapteng, jet say nemnemen to koma, sota mengi-kan ni pan-iinawatan ni totoo. Ta si Apo Shiyos, eg to ioway sota ira maronong; to kaiakan sota sha keshevata. Nem sota toon ngaaw i aramid sha, eg khosto nen Apo Shiyos; kontra to ira.” Sajay i inkowan ni naysolat nonta bayag da. 

                                                                                                              –1 Peter 3:8-12, Inibaloi DMP

Kalejo ta mantedimokod tan manshomog kito
                ja manshejaw son Yahweh ja emalsowen si-khatejo.
Ta si-khato i Shiyos tayo jet totoo tokito,
                may-eshig ey kalniro kiton si-khatoy kaon-ad-ajowan so.
Itnengi jo koma niman na akhew iya kowan to.
Kowan to ey, “Karejo petangken i nemnem jo
                ja inges ni inpaspasing da ni am-amejo

nonta timpon kawashara shi Meribah
                shi dogad ja enshiy toon nanbalbaley ja sakop ni Massah.
Shiman, pinedpeshas shaak nonta ira am-amejo la
                angkhen na inon-an shen mismo iray nak dingdingkha. 
                                                                       –Psalm 95:6-9, Inibaloi draft

Si-khak ja si Yahweh jen Shiyos jo, si-khayoy nak engipa-sasan.
Inpa-sas kon si-khayoy semek ja enshiy to pengintegan,
                sota nak kepengisekit son si-khayo, enshiy to nanbaliwan. 
                                                                –Jeremiah 31:3, Inibaloi draft

Kemansoan

Day 13
Adapted from Discovering Joy: Daily Meditations for Friends of God by Marie Chapian

Say epateg so ni emin, mesepol la wara ni olay son si-khayo sota agpayson semek jo so ni sakey tan sakey son si-khayo. Ta no wara iyay ya semek son si-khayo, mebedin ma ja manpipinasinsiya kayo ni nankolangan ni sakey tan sakey son si-khayo, angkhen nansasekdet i nankolangan sha. –1 Peter 4:8, Inibaloi DMP

Amtak i wared nemnem mo.

Owen! Amtak i mo kenemnemnema.

                Kareka koma ontakot son Si-khak

                tan so nonta planok para son si-kham.

Sota ira nak kepengigsheng ket sigon shi dokod ko:

                Si-khak i kedepoin semek; Si-khak i kedepoin kaasi.

No eg ka maapolbaran

                ensakit,

nem piyan kon memanso ka koma

                say ba-dan mon sengoen

sota ira ngaaw iren ipana ni sairo

                son si-kham.

Sota itek ono kinakospag mo tan sota mo kepanshanshanag

                ket mas dilikaro

ey say sota kepemedaw ono sota ira kharil jen naykontra son si-kam.

                Nemnem mo, sota Anak Ko ket pilmin inokhes ni emin na totoo;

                pinebesolan sha, binedaw sha, tinaynan ni khagajem to.

Karam pekevas bengbengat i deknam

                shi mo pan-ep-epos tan kepengibedbediw ni bakdang mo;

karam pekevas i bakdang mon shorog

                shi kinapaisham jen mo kepanrikriklamo.

Shi apil et ngo mowan da i mo kepengpengnapi

                ni mo kay-a-tekan tan mo kaapolbaran.

Ipiyal mo komay nemnem mo,

                pati deknam,

                son Si-khak.

Si-khak i emengipabo-day tan emengipaditop ni sekhit;

Nak kaika-jat i too

                manipod shi angkhen nganton embolinget jen naykes-ongan to;

                isalakan taka.

Si-khak bengat i Shiyos, ayshi eshom.

Say epateg so niyay ya emin, sota pamati so nen Cristo. Say arig niya pamatiyo, singa kalesay jo ja pena-din jo ni bakdang jo no wara diy ipana nen Satanas ja singa apoy ya emanshedang, ja may-eshig shi aramid ton meneshal ni too. –Ephesians 6:16, Inibaloi DMP

Jet niman, say maonod ja ikowan ko son si-khayo, sajay. Say nemnemen jo ja mengi-kan ni kedsang jo, si Apo Jesus, tan sota panakabalin to. –Ephesians 6:10, Inibaloi DMP

Mesepol la si Apo Shiyos i pankombabaan jo say si-khato met laeng i mengi-kan ni kedsang ni pamatiyo.                                                                                                       –James 4:10, Inibaloi DMP

Sesmeken i Bakdang

Day 11
Adapted from Discovering Joy: Daily Meditations for Friends of God by Marie Chapian

Baka et ey dinibkhan jo ey say bakdang jo ket, Timplo ni Ispirito Santo ja inpan-iyan nen Apo Shiyos son si-khayo. Isonga say bakdang jo, aliwen kokowayo. –1 Corinthians 6:19, Inibaloi DMP

Pananeng mo komen malinis i timplon nak kepan-iyani,

                babaen ni semek tan ajowan.

Eshakel iray piyan kon pedekha son si-kham

                tan eshakel iray dogad jen piyan kon davan mo;

                karam koma damsisen i ayab kon si-kham.

Angkhen shi timpo jen waray sakit

                Si-khak pay laeng sota esantoan tan kangatoan;

jet angkhen shi kinakapoy mo

                Si-khak i makedsang.

Naykhaitak son si-kham shi angkhen nganton sitwasyon

                ni pisikal jen bakdang mo:

                no nabdey ka ono no mapaltak ka;

                no naagang ka ono no napsel ka;

                no waray ensakit jen mo kedekdeknaa ono no waray mo kekhenkhenasa.

Ajowanim i bakdang mon shorog.

                Karam koma okhesen.

Karam koma insoltoen.

                Iaknim koma ni rispito.

Ashal mo koma no ngantoy kasapolan to,

                no toy pesing ton man-anshal jen mapteng.

                Aliven kabosol mo i bakdang mo.

Ipa-sas kon si-kham

                i pesing jen on-abak iren paras shi bakdang

                tan sota pesing jen menmek ni timplo

                jen in-akan kon si-kham.

Pananeng moy nemnem mo jen makedsang,

                tan enapnoan ni namnama;

                masipot komay nemnem mo,

                amtam koma jen mengidesin.

Ajowanim i bakdang mo

                jet pansigshan mo met laeng.

Nem si-khayon nak kaikarin annak ko, wares Apo Shiyos son si-khayo, isonga inebak jo ira jay; eg kayo naawis. Ta si Apo Shiyos ja wara son si-khayo, makedkedsang nem say si Satanas ja wara so nonta ira karakdan shiya dobong ja eg emati. –1 John 4:4, Inibaloi DMP

Ishayashayaw ko si Yahweh
                shi emin na kedsang tan nemnem ko.
Ishayashayaw koy esantoan na ngaran to. –Psalm 103:1, Inibaloi draft

Ajowanim i Bakdang Mo

Day 10
Adapted from Discovering Joy: Daily Meditations for Friends of God by Marie Chapian

Inbilin to ey ma-khasan ira jet siya minmapteng ira,

               tan naysalakan ired ketey sha koma. (Psalm 107:20, draft)

Si-khak i emengi-kan ni kedsang tan salon-at mo.

               Say salon-at ket emedepo son Si-khak ja si Shiyos.

Say piyan ko,

               ajowanan mo komay bakdang mo.

Sota ira eshom ma annak Ko, ekapoy i bakdang sha

               jet arig to ey ira emekideban ni inakhew say mewad-an iren kedsang.

Wara noman i sha da-da-kamin sakit

               ono waray depekto ni bakdang sha.

Nem sota ira annak kon emanda-da-kam ni sakit,

               epateg ira son Si-khak,

               sota Ispiritok i emaytakshol son si-khared sha kepandikhat.

Ajowanim i bakdang mo:

               Patkhim i bakdang mo

                              ta epateg son Si-khak

               i emin jen parti ni kinatoom.

Wara iray toon sankaekmon bengat

               i sha kaevaten kenen sha ni inakhew,

enshi noman i kabedinan shen manpidi.

Nem si-kham, mebedin mo mangon pidien

               jen ajowanan i bakdang mo:

Pangan ka ni kosto,

               pan- exercise ka,

               kaokhip ken kosto.

Sota mapteng koma i pidien tan dag-en mo.           

Jet kowan to son si-khara ey, “No itenengan jon kostoy esel ko tan sota ira nak kaibilang ey kosto i dag-en jo, tan tongpalen jo iray bilin ko, tan kelmegan jo iray dinteg ko, ekhak itolok ja manda-kam kayo ni sakit ja inges toy inpala-kam ko so nonta ira taga Egypt. Tep Si-khak si Yahweh jen Apo ja emengekhas ni sakit jo.” (Exodus 15:26, trial)      

Anak, itnengim ma pasiya iya ikowan ko, iki-dengim ma kosto. Karam dibdibkhan iya ikowan ko, imoddam shi nemnem mo.Ta sota toon to kaevati tan to kedag-a ireja ikowan ko, si-khatoy may-aknan ni siged jen biyag tan mapteng nga dekna ni bakdang. (Proverbs 4:20-22, trial)

Nem say kowan ko, no mengan kayo, ono menginom kayo, ono ngarantoy kowan jo ey dag-en jo, nemnem jo nin no kayshedjawan nen Apo Shiyos. (1 Corinthians 10:31)

No sipa son si-khayoy eg to amtay pespesing to, mesepol la si Apo Shiyos i panshewatan to, jet si-khatoy ontolong son si-khato ja mannemnem ni kosto. Ta si Apo Shiyos, to kaiakni sota mengshaw son si-khato; eg to bebaingan. (James 1:5)

Digat, Paras, Bindisyon

Day 9
Adapted from Discovering Joy: Daily Meditations for Friends of God by Marie Chapian

Ta si-khak, niman na wara-ak pay laeng shi biyag, waraak son Cristo et naka pandadsaki; nem no meteyak, mas edaddadsakak pay mowan ali shi dangit. –Philippians 1:21

No say mo kaas-asa

               ket bindisyon bengat,

               ono sota ira bengat kinshaw mon in-akan Ko,

jen emengipa-sas ni semek Kon si-kham,

               enagshengan i amtam

               maypangkhep son Si-khak.

Sota ira rigalo jen nak kaiakan son si-kham

               ket singa sota naamag jen kansiyon.

Nak emengi-kan ni siged

               jen inges to sota khekhanas i teneng ton tiyon ni kansiyon,

               nem nak ngo emengi-kan iren banag jen eg ma-ma-vatan

                              ja inges to sota ira linya ni kansiyon jen nay-emot i olog to,

               tan nak ngo met laeng emengi-kan iren pandikhatan

                              ja inges ton waray parti iren kansiyon jen edigat i awat to

               et wara pay iray timpon singa ma-khes bengat in nak kaiak-akan.

No ka emankararag

               tan emansilbi

say bengat ta maaknan ka

               iren naindobongan jen bindisyon

tan khonkhona,

               dismaya ni olay

i maytakshol son si-kham.

Wara komay si-met mo shi biyag

               ja angkhen singa ka eman-ekad shi ekhangkhangal ja shalan

ja inges ton waray si-met mon manbiyag

               no mapteng i emin ja singa naskhitan i kawad-an mo

                              tan wara iray nangkemapteng nga sabsabong shi nandiniked mo.

Sota Ispiritok, wara ni olay shi angkhen towa

               wara ladten khait mo shi digat man ono nam-ay.

Piyan kon iakan emin na mapteng jen banag

               para shi pansigshan ni biyag mo,

               nem eg mo ma-vatan:

                        Sota ira paras jen digat ket bindisyon met laeng jen edapon Si-khak,

                        Sotan iray singa emengobol son si-kham say onsiged ken too.

Eg ka koma medismaya no onmotok aliy paras;

               Arig Ko sota baton sekdin tan mebedin na pan-a-motan,

                              arig Ko sota sishoman jen pan-inanaan,

                                             ta Si-khak sota Mengisedakan tan emengajowan.

Aliva komen saja dobong i piyalen mo

               jen mengi-kan ni emin kasapolan mo.

               Si-kham ma ensemek ko—

Si-khak i kasapolan mo.

Gapota si Yahweh ja kangato-an i kinemang mo,
               tan si-khatoy inpanbalin mon salaknib mo,
enshiy ngaaw wa mepesamak son si-kham
               ono on-esop shi baley mon memedigat son si-kham.
Bidinen nen Yahweh iray anghil to say shaka ajowanan
               shi towa man na mo dawdawan. –Psalm 91:9-11, draft

Si-khayon a-akhik shi pamati, no waray onsabi son si-khayon digat—angkhen nganton digat—karejo nemnemnemen ey ngaaw sotan na sinmabi son si-khayo, no diket nemnem jo ey sotan na digat ta sinmabi ket panmaptengan jo. Ta amtayo ey sotan na pandikhat jo ket si-khatoy pemeshas nen Apo Shiyos ni pamatiyo et say maydowam kayo men mengenos ni digat. –James 1:2-3

Kowan ni kansiyon to ey,
“Si YAHWEH, may-eshig ey badeg ga baton sa-din ko,
               si-khatoy may-eshig ey amotan ja kesalbaran ko. -2 Samuel 22:2, trial

Si-kham Yahweh i nak itangkhak,
               karam koma ipalobos ja maybebaingak!
Mapteng i moka pesing isonga tolongimak,
               itnengim i shawat ko et isedakanimak! –Psalm 71:1, draft