Osalen i Kabaalan

Day 5

 Edapod  Discovering Joy: Daily Meditations for Friends of God nen Marie Chapian

Nem si-khak, say biyag ko, ekhak ibilang ey epateg ono ebanol son si-khak. Say wared nemnem ko, piyan kon meksheng sota obda ja in-awat nen Apo Jesus son si-khak ja mengitosho ni mapteng nga shamag pangkhep ni kaasi nen Apo Shiyos. 

–Inpaspasing 20:24

Say pamatin waray mapteng nga sobadit tod kaonoran,

sota pamatin kaonong ingkhatod kesheng;

               sota kepanbiyag jen emengosal nonta kabaalan jen in-akan Ko.

No say mo kedagdag-a

               ket khotkhotot

               ma-ma-khes

               nangnangis

               khabol iren banag jen kayam met jen sengoen

               ta in-aknan taka ngarod ni kedsang,

               nganto mangoy osal iren kabaalan jen in-akan Kon si-kham?

Toy pesing to ngay jen ondames I pamatim?

Mo kaiem-emot I kabaalan mo jen eg mo et osalen.

Sajay I ikowan kon si-kham niman:

Osal moy kabaalan jen in-akan kon si-kham!

Sota pamatim komay mengi-kan ni kedsang

               son si-kham shi mo kepanbiyag para son Si-khak:

Shi ngaran nen Anak Kon si Jesus, may-emag komay emin na parti ni biyag mo.

Panbiyag ken waray si-met ni pamatim ja singa sota wara ka med kekshengan

ja enshi ma lay saya khabol ni ingkaabak,

ja say wara bengat ma ket sota dadsak

khabol ni pangabak.

Ashal mon man-imdeng ni olay

               angkhen shi simplin banag.

Si-kham ma ensemek Ko, paonong moy mo kepemiyal son Si-khak

               tan ishemshemag mod emin sota ira dingdingkhak:

Sajay I emengi-kan son Si-khak ni dadsak.

Ta enshiy khabol

               jen man-aborido iray annak Ko,

               ja manshanag ira,

               ja manpa-bak ira shi takot sha.

Eg ka on-onong nodta itsoram nonta nanshogian ni pamatim,

               anap mo sota mengi-kan ni talna son si-kham,

am-amtam pay no sipa ka

               no ngantoy relasyon mo son Si-khak

               ingkhatod kaonoran

               ingkhatod kesheng ja assen mo ma sota pinatim.

Si-khato met laeng i engikowan ey may-eshig kito konon singa arin emin, tan parin emansilbi so nen Apo Shiyos ja Ameto. Jet si Jesucristo, angkhen sipa, enshiy maka-inges son si-khato tep si-khatoy kakedsangan so ni emin na toray ingkhatod ingkha, enshiy eshom. Siya, satan da.
No ka-onoran alin timpo, ondaw mowan ali ja metaksholan ni kolpot et emin na too, tan angkhen pay sota toon timebek son si-khato nontan da, assen sha. Jet emin na tood ja dobong, onnangis ira ni daringit sha. Siya, sajay aliy medeka. –Revelation 1:6-7

Jet say shawat mi pay son Apo Shiyos, si-khato komay mengi-kan ni edagshen kedsang ni pamatiyo, ta Manakabalin, say angkhen ngantoy mepesamak son si-khayo, itoled jo et man-enos kayo, tan man-imdeng kayo pay koma.
Jet kowan mi pay jey amta-an jo komen man-iyaman ni olay son Apo Shiyos, ja Ametayo, ta inkowan to met ey kitoka maykeshi ja mayda-kam so nonta mapteng nga wara son si-khato ja i-akan tod dangit so nonta ira memati son si-khato. Pan-iyaman kayo son si-khato. 

 –Kolosas  1:11-12

Nem para son si-khak, Yahweh ja Shiyos ko,
mas pipiyan kon may-a-sop shi kad-an mo.

Si-kham i pinidik ja may-eshig ey pan-inan ko
jet ishamashamag koy kaskasshaaw wa inem-emag mo. –Psalm 73:28

Dingkhak i kabaalan ko shi obdak ja singa ekigobatak shi khobatan, ono singa ekilongba-ak ni betik, jet siningpet kon inonod tan intoro shi eshom sota pamatin naypiyal son si-khak.
Jet niman ma, waray naysagana ja primiyok, jet sajay, enshiy eshom nem eg panbedin kon toon enshin polos i basol to shi dangit. Sajay ya primiyok, i-awat nonta kostoy toka pengigsheng ja si Apo Jesus. Jet aliven si-khak bengat i i-awatan to so, no diket wara ngoy para so nonta ira eshom ja eman-a-agag ni idaw ali nen Cristo tep ensemek sha.

-2 Timoteo 4:7-8