Ebanol Ken Si-khak

Day 3

 Edapod  Discovering Joy: Daily Meditations for Friends of God nen Marie Chapian

Tangkhak kayo jet on-iyoy naykayang!

Panmolimoli kayo jet idmang joy shaga!

Ta sama naykayang, maomas alin singa asok,

jet saja shaga, mebi-nik alin singa shaan na baro.

Sota ira emanbibiyag shiya shaga,

metey ira din singa imok ni abos.

Nem sota pengisedakan ko, on-onong ni ingkhatod ingkha,

enshiy pengintegan nonta enshiy kolang ton pantoshay ko.

(Isaiah 51:6, Inibaloi Version)

Aliven mapteng

i man-ab-aborido:

Aliven khostok itan.

Emin na kedsel tan dedamsis ni eshom

jen mo an dina-da-kaman,

panbedin kon mapteng i to panbenagan,

               emin iretan, panbedin kon panmaptengan

               ta si-kham,

               ebanol ken Si-khak

               tan ensemek taka.

No sota eshom ket aliven kostoy sha kedag-dag-a

               ja eg nay-anam nodta piyan mo koma,

               Si-khak i makaproblima nitan jen banag,

jet Si-khak ngoy makaamta

               jen mengigsheng son si-khara.

Eg mo koma ibilang I bakdang mo

               jen engatngato:

Sota kepandastog, ayshiy mapteng jen iakan to.

Too ka bengat;

Si-khak ket Shiyos.

Ayshiy kamalik.

Eg taka baybay-an.

               Pan-akshan moy emin jen banag

               jen inplanok para son si-kham:

               Sota ira paras mo ket epateg son Si-khak.

Malinis, eshiyosan tan kosto i mo kepannemnem

               no naykhait ken olay son Si-khak.

Sota Ispiritok, kabaalan to

               jen dag-en i emin na banag

               ja inkarik.

Mewesha komen si-kham sota imdeng

               jen kaiakan ni mo kepemiyal son Si-khak.

Pan-imdeng ka,

               si-kham jen ensemek ko,

               ensemek taka.

Psalm 43:5; Jeremiah 31:3; Romans 15:15-16

Oli Ka Ali

Day 2
Edapod  Discovering Joy: Daily Meditations for Friends of God nen Marie Chapian

Imesel ja kowan to ey, “Isalsheng jo!
                Nemnem jo ey si-khak i Shiyos jo.
Bigbigen di ni emin’na totoo ey si-khak i kangato-an,
                emin’na nasyon di shiya dobong ket nak itorayan.”

                                                                Salmo 46:10 (draft translation)

Isonga panbebawi kayo ni ngaaw wa aramid jo, jet si Apo Shiyos i toshongen jo say omasen toy basol jo,...

                                                                                                Inpaspasing 3:19

Ngantoy jen mowak ibetbetiki?

          Singa ka et den sota emanbebtik ded katetakot

jen embolinget,

          jet ka emanbebayedbed nodtan

ni takot mo ey enshi met koston khabol.

Ekhak mengi-kan

          ni banag jen mo an pan-ab-aboridoan;

Eg taka itorong shi embolinget ta shalan

          jen mo kesaolan tan keskelan

ja singa ikem-ot tokeda nonta ira kompormin mo kesengsengoa,

          tan arig to ey maykes-ong ka la jen ka kagos bengat ni obda.

Aliven Si-khak I engitoshong si-kham

          shi kepandikhdikhat ni deknam.

Say semek, eg mengi-aw-awan, eg mengi-kan ni kesaolan,

          ono mengshaw ni banag jen eg kaya ja may-ekan.

Say semek, eg to ma-maen I digat

          ni toon

          emanda-kam ni paras.

Say semek, emengibodos,

          to kebadoi sota sigod,

                    emengi-kan ni si-met,

                    emengi-kan ni biyag.

Jet Si-khak sota semek jen mo kaen-enapa.

Oli ka ali.

Si Shiyos i mengipakedsang son si-khatajo tan tayo kemangan,
          kanayon’na kaontolong no waray digat ja tayo da-kaman.
Isonga eg kito metekot angkhen mejegjeg iya shaga
          tan megshay iray shonshontog ja maypedaw shima baybay da...

                                                                       Salmo 46:1-2 (draft translation)

Ipa-sas mo koma diy kaskasshaaw wa semek mo,
          ta si-kham i emengisedakan babaen ni panakabalin mo
                    so nonta ira totoon si-kham i sha kakemanga
                              no os-osilen ira ni kabakal sha.

                                                                       Salmo 17:7 (draft translation)

Koston Imdeng

Day 1
Edapod  Discovering Joy: Daily Meditations for Friends of God nen Marie Chapian

Sajay I kowan ko son si-khayo, say mayda-kam kayo nodta imdeng ja wara ngo son si-khak, jet mas pay jen man-imdeng kayon pasiya.

(San Juan 15:11)

Sota sandasos ja tawen jen panbiyag

       ket sangkaatikan bengat son Si-khak.

No apil la shalan i mo kaisi-ning jen piyan mon davan,

       ja sota nayparit et I mo kekhamkhamkhami—

no mo kakhenkhenasa I basol

       jet eg mo la nemnemen ey sotan gayam ket onpool—

       bakdang mon shorog i ma-tongan.

Jet asan mo mang kesheshamagen Si-khak ja kowan mo ey, “Ngantoy?”

Ikowan kon si-kham, si-kham jen epateg son Si-khak,

       kokowa taka, satan ket eg mebediwan

       Kokowa taka: polos jen eg taka baybay-an.

Polos jen eg taka ibenegan,

       eg taka taynan.

Amtak no ngantoy kait-itsoram.

       Ekhak ijetjet I egshik son si-kham,

       nem eg taka et ngo mowan ibolos jen iolay.

Si-kham ma ensemek ko, wara shi nemnem mo,

       ja say koston piyan mo

       ket sota koma kaybodos mo

       manipod shi basol

       jen onkhabol ni ka-tongan tan kakevatan.

Piyan taken asen jen  naybolos

       ja wara ka med kad-an ni Silew jen emengajowan,

       esilvan ka ma ni semek Kon enshiy to pengintegan.

Nay-anak ka,

       aliven say mandeshingit ka khabol ni kangaaw ni biyag

       no diket man-imdeng ka khabol ni kinamapteng to;

       si-kham,

       nay-anak ken mengi-pasas ni semek tan mengenkenas ni biyag—

       nay-anak ken mengamta no ngantoy koston imdeng.

San Juan 16:1, 33